Әгерҗедә иреклеләр хәрәкәте барлыкка килүгә ун елдан артык

Ачык эмблемалы ак футболкалар кигән бу кыз-егетләрне шәһәр урамнарында да, паркларда да, мәдәни чаралар вакытында да еш күрергә мөмкин. Алар – төрле акцияләрне башлап йөрүчеләр һәм чаралар уздыруда беренче ярдәмчеләр.

Сүзебез  – иреклеләр (волонтерлар) турында. Әлеге хәрәкәт хакында яшьләр сәясәте бүлеге начальнигы Татьяна СЕРГЕЕВА белән әңгәмә корабыз.

• Татьяна Сергеевна, 2018 ел Россиядә Иреклеләр (волонтерлар) елы дип игълан ителде. Әгерҗедә иреклелеләр хәрәкәтенә ничә ел?
• Әгерҗедә беренче волонтерлык отряды 2006 елда “Ровесник“ яшүсмерләр клубы каршында оешты. Ул чакта әлеге клуб белән мин җитәкчелек итә идем. Әлеге отряд әле һаман да бар. Ул кече яшьтәге мәктәп укучыларын берләштерә. Төп юнәлешләре – сәламәт яшәү рәвешен пропагандалау. Волонтерлар тырышлыгы белән сәламәтлек һәм игелекле гамәлләр дәресләре уздырыла. Алар – язгы Игелекле эшләр маршын төп оештыручылар. “Тәмәкесез Россия“, “Мәктәпкә җыенырга ярдәм ит“, “Раштуа бүләге“, “Укытучыңны котла“ кебек акцияләр һәрчак волонтерлар катнашында уза. Инвалид балалар белән эшләүгә зур игътибар бирәләр. Волонтерлар экологик акцияләрдә катнашалар, һәйкәлләр тирәсен кардан чистартырга булышалар.   
• Әгерҗе иреклеләре ничек барлыкка килде?
• Вакыт узу белән иреклеләр хәрәкәте киңрәк колач ала башлады. Шуңа күрә “Авангард“ яшьләр үзәге базасында “Әгерҗе иреклесе“ дип аталган балалар-яшүсмерләр оешмасын төзергә булдык. Бүгенге көндә аның белән методист Кристина Ишкатова җитәкчелек итә.

Ул өч бүлекчәне берләштерә. Беренчесе – “Җиңү волонтерлары“. Бөтенроссия проектында катнашучылар буларак, алар эзләнү эшләре алып баралар, ветераннарның хәлен беләләр, тарихи квестлар, “Георгий тасмасы“, “Россия гимнын бергәләп җырлыйбыз“, “Урман утырту көне“ кебек акцияләр уздыралар.

Икенче юнәлеш “Сәламәтлек сессиясе“ дип атала. Бу – республика проекты нигезендә психоактив матдәләр куллану буенча профилактик эш алып бару һәм яшьләр арасында сәламәт яшәү рәвешен пропагандалау.

“Дөньяның барлык төсләре“ дип аталган өченче юнәлешнең төп максаты – халыклар арасындагы дуслык, тынычлык, бердәмлекне ныгыту.

• Әлеге хәрәкәттә шәһәр мәктәпләре укучылары гына катнашамы?
• Бу хәрәкәт авылларда да бар. Алар күбрәк эзләнүчеләр, тирмурчылар, экологлар буларак билгеле.

Быел, “Җиңү волонтерлары“ проектының икенче дулкыны башлангач, Көчек, Иж-Бубый, Тирсә, Бима мәктәбе укучылары да әлеге хәрәкәткә кушылды.

• Иреклеләр берлегенә яшүсмерләр нинди принцип буенча сайлап алына?
• Отрядка беркем дә мәҗбүри рәвештә җәлеп ителми. Әгәр кемдер бер тапкыр килеп ирекле рәвештә игелекле гамәл кылса да сөенәбез.

Иреклекләр сафына теләге булган һәркем кабул ителә. Бала үз ярдәменең кирәклеген күңеле белән тоя икән, ул, гадәттә, отрядта кала. Чөнки аның алга бару теләге туа.

Бездә кызыксындыру чаралары да бар. Әйтик, актив балаларга иреклеләр кенәгәсе тапшырыла. Ә ул югары уку йортына кергәндә өстәмә баллар бирә. Безнең районда мондый кенәгәләр 15 иреклегә тапшырылды.

• Иреклеләр хәрәкәте үзлегеңнән үсү өчен дә мөмкинлекләр ача бит...
• Әлбәттә. Атнага бер тапкыр яшьләр үзәгендә алар белән махсус курслар уздырыла. Әлеге хәрәкәт граҗданлык җаваплылыгын да арттыра: булышырга, төзәтергә, эшләргә кирәк. Акча өчен түгел, ә нәтиҗә өчен эшләү күңел халәтенә әверелә.

2нче мәктәпнең чыгарылыш сыйныф укучысы Илья Ивановка иреклеләр кенәгәсе беренчеләрдән булып тапшырылган иде. Хәзер ул иреклеләрнең республика үзәгендә эшли.

• Балаларның мондый хәрәкәтләрдә катнашуларын әти-әниләре хуплыймы?
• Кызганычка каршы, барлык ата-аналар да аңлап бетерми. Соңыннан үзләре үк балалар ялкау һәм битараф дип аптырыйлар.
• Алдагы планнарыгыз белән дә уртаклашыгыз әле...
• Планнар зурдан. Грант проектында катнашып җиңү яуларга хыялланабыз. Иреклеләр елында зур форум уздырырга дигән уебыз да бар. Анда шәһәрдән генә түгел, авыллардан да волонтерлар катнаша алыр иде.
• Барлык хыялларыгызның тормышка ашуын һәм иреклеләрнең сафы тагын да артуын телибез.

Әңгәмәдәш – Екатерина САМСОНОВА.