Районыбызның сәләтле гаиләләре талантларын күрсәтте

2018 елның 30 марты, җомга

Районыбызның иң матур, сәләтле сигез гаиләсе 3нче мәктәптә узган “Талант гаиләдә туа“ дип аталган бәйгедә чыгыш ясады.

Сәләтсез бала булмый. Бары баладагы сәләтне вакытында күреп алырга һәм үстерә белергә генә кирәк, диләр. Ә бу – ата-аналарның турыдан-туры бурычы. “Талант гаиләдә туа“ дип аталган бәйгедә катнашкан барлык әти-әниләргә дә нәкъ менә шушы сыйфат хас. Бу гаиләләр үзләре дә буыннан-буынга килүче матур традицияләр нигезендә тәрбияләнгәннәр, аларны балаларында үстерүгә дә зур игътибар бирәләр. Моның нәкъ шулай икәнлеген әлеге гаиләләр әзерләп алып килгән видеороликларда күрергә мөмкин иде. Бәйге барышында исә нәни малай-кызлар бу традицияләрне үз чыгышларында чагылдырырга омтылдылар. Әйтик, 3нче бакчадан Амалия ҖИҺАНГӘРӘЕВА дәү әбисе Илгизә Рәхмәтуллинаның 1960 елларда Әгерҗедә театрда уйнаганы, бик матур итеп җырлаганы белән горурлана.

  • Аның тавышы “Татар радиосы“ фондында да саклана. Фотосы Әгерҗе тарихы китабында урын алган, дип сөйләде нәни кыз.

7нче бакчадан Лениза ГАЛИМОВА исә “Иң матур тел – татар теле“ дип, туган телен ничек яратуын бәян итте. Аларның гаиләсе төрле уен коралларында уйнап та күрсәтте. Шушы ук бакчада тәрбияләнүче Зәринә ГАЛӘМШИНА үз чыгышында авылны яратуын чагылдырды. Бу гаилә бәйге өчен махсус костюм да тектергән иде хәтта. Тирсәнең “Миләүшә“ балалар бакчасыннан килгән Нәҗибә ХАРИСОВАшигырендә гаиләләренең бердәмлеге тасвирланды. Юкка гына аларның гаилә ансамбле яраткан җырчыбыз Гүзәл Уразова репертуарыннан “Балаларым“  җырын сайламагандыр. Бимадан Екатерина БАШИРОВА, Пеләмеш башлангыч мәктәп-бакчадан Дарина ШАМЕЕВА турында да мари традицияләрен дәвам итүчеләр дими, ни дисең?!  Кечкенә кызларның туган телләрендә бик матур итеп шигырь сөйләүләрен, якыннары белән бергәләп сәхнәне ду китереп тыпырдап биюләрен тамашачылар да бик җылы кабул итте. 9нчы бакчадан Никита ЛОПАТИН әти-әнисе белән бергәләп “Туган як“ җырын татар, рус, удмурт телләрендә яңгыратып шаккатырса, 6нчы бакчадан Илья РЯБОВ әти-әнисен, апасын рус биюенә дәште. Әлеге биюнең заманча вариантын тәкъдим итте Рябовлар гаиләсе.  

  • Без бүген районыбызның иң матур гаиләләре чыгышларын күрдек. Милли костюмнарда килүегез генә дә сезнең үз гаиләләрегездә традицияләрне саклауга зур игътибар бирүегез турында сөйли. Шушы матур гадәтләрне буыннан-буынга дәвам итегез, диде үз чыгышында район мәгариф идарәсе начальнигы Вәсилә Сафиуллина.   

Бәйге җиңүчеләре исеменә Дарина Шамеева һәм Никита Лопатин лаек булды. Алар “Сәләтле балалар“ район фестивалендә дә зурланачак. Калган катнашучылар – төрле номинация җиңүчеләре. Аларның һәркайсына кыйммәтле бүләкләр, Грамоталар, Рәхмәт хатлары тапшырылды. Бүләккә бәйрәмне алып баручылар – 5нче бакчадан Дилия Закирова, 8нче бакчадан Радмир Ситдыйков та лаек булды. Алар да, үзләренә тапшырылган рольләрне бик оста башкарып, талантлы конферансье икәнлекләрен расладылар бу көнне.             Ххх Район мәгариф идарәсе әлеге бәйгегә бүләкләр алуда матди ярдәм күрсәткән “СтройГрад“ ширкәте директоры Али Ибраһимовка, Әгерҗе электр челтәре начальнигы Айрат Гыйльмановка, “Мадагаскар“ күңел ачу үзәге директоры Александра Кармановага, бүләкләр ясауда булышкан Салагыш мәктәбе, Бима, Варкләд-Бодья балалар бакчалары,  Пеләмеш мәктәп-бакча педагогларына рәхмәтен җиткерә. 
http://www.agryz-rt.ru/
Фоторепортаж
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район һәм шәһәр турында
Документлар
Матбугат үзәге
Гражданнар мөрәҗәгатьләре
Телефон: (85551) 2-20-42
Факс: (85551) 2-27-05
E-Mail: Priemnaya.Agryz@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International