Әгерҗе районына хаҗилар кайта башлады

2018 елның 4 сентябре, сишәмбе

Барҗы-Умгадан Зәмфирә МОРАТОВА бер төркем дин кардәшләребез белән шушы көннәрдә хаҗ сәфәреннән кайтты.  

• Миңа хаҗия булу мөмкинлеге биргән Аллаһы Тәгаләгә бик рәхмәтлемен. Без ерак сәфәргә 6 августта ук кузгалган идек, 29ында исән-имин кайтып та җиттек. Ямурзадан Илнур, Дамир Сәхиповлар, аларның җәмәгатьләре, Нәзирә ханым Шәймөхәммәтова белән бер төркемдә булдык. Хаҗга беренче барулары гына булмагач, бөтен тәртипне беләләр, безне дә бик теләп өйрәттеләр. Ярдәмчел, кешелекле булганнары өчен Ходай Тәгалә үзләрен зурласын иде. Гомумән, минем өчен хаҗ сәфәре авыр булмады. Моңа беренчеләрдән булып юлга кузгалуыбыз да йогынты ясагандыр. Хаҗның барлык гамәлләрен дә үтәп бардык. Шартлар да бик яхшы. Барҗы-Умга клубында кардәшләребез белән очрашуда да шулар хакында сөйләргә ниятләп торам. Хаҗдан иманымны тагын да ныгыту, динебезгә ныграк якынаю, мөмкинлек булса, киләчәктә кабат изге сәфәргә бару нияте белән кайттым.