Касайда яшәүче тыл ветераны гомер буе күршеләре белән дус яшәгән
Туганлык, күрше хакының кеше яшәешендә иң кирәкле һәм кыйммәтле сыйфатлар икәнен тагын бер кат күрдек Касай авылына тыл һәм хезмәт ветераны Рәшидә Әхмәтҗанованы 90 яшьлек юбилее белән котларга баргач.
Касай авылында туып-үскән кыз эшкә батырлыгы белән күпләрне таң калдыра. Гаиләдәге дүрт баланың иң өлкәне булгач, бик яшьли әниләре белән урак урырга йөри. Яшь кызның куллары канаса да сер бирми. Язгы чәчү вакытында Красный бордан арба белән орлык ташыганда да сынатмый. Үсмер кыз булгач фермада сыер сава, бозаулар карый – кайда гына эшләсә дә күңел биреп, эшен җиренә җиткереп башкара.
- Безнең әти бакчадан керәдер иде дә, торыгыз, Рәшидә бакчасын казып бетергән диеп, безне куып чыгара торган иде, – дип сөйли күршесе Рәхимҗан.
Күршеләр дигәннән, ул күршеләр белән шулкадәр матур аралашып, ярдәмләшеп, дус, тату яши. Юбилее көнендә дә күршеләре Мөнзилә, Айгөл, Кәүсәрия, Зәмфирә, Флүрә, Әлфия иртүк кереп котлыйлар аны.
Хәзер, күзләре ачык күрми башлагач, кышкы көннәрдә сеңлесе Нәсимә, кияве Мәхтүр янында яши.
- Апам гомер-гомергә эшчән, чиста-пөхтә, туган җанлы булды. Әниебез урын өстенә калгач, яшь баладай тәрбияләде. Безнең балаларыбызны бик якын итте, алар да аны бик хөрмәт итәләр. Кызым Гөлсинә берсеннән-берсе матур киемнәр алып кайтып кына тора аңа, – ди сеңлесе Нәсимә.
Юбилее белән котларга да кайткан Ижаудан Гөлсинә. Аңа да, олуг юбилее белән котларга килгән район башлыгы урынбасары – район Советындагы “Бердәм Россия” фиркасе җитәкчесе Ришат Нурисламовка, халыкны социаль яклау бүлеге җитәкчесе Альмира Зариповага, Кадыбаш авыл җирлеге башлыгы Илфат Рамазановка, социаль хезмәткәр Земфера Әхмәтҗановага, туганнарына, күршеләренә рәхмәтләрен кат-кат әйтте юбиляр.