Тирсәдә шәхси хуҗалыкларда терлек саны арткан

2018 елның 16 марты, җомга

ТР Дәүләт Советы депутаты Альберт Хәбибуллин, район башлыгы Валерий Макаров катнашында узган чираттагы гражданнар җыенында Тирсә авыл җирлеге башлыгы Рафил Закиров биредә яшәүче халыкның тормыш-көнкүреш шартлары турында бик тәфсилләп  сөйләде. Төрле предприятиеләрдә хезмәт куюы белән беррәттән, җирлек халкы терлек асрап, яшелчә үстереп, умартачылык белән шөгыльләнеп тә байтак кына керем ала. 

  • Җирлегебездә терлек саны да тотрыклы саклана. Алдагы ел белән чагыштырганда, мөгезле эре терлек саны – 42, атлар 11 башка артты да, – диде авыл башлыгы.

Аның сүзләрен раслап, район авыл хуҗалыгы һәм азык-төлек идарәсе начальнигы Дилүс Гатауллин узган ел Әгерҗедә оештырылган 28 авыл хуҗалыгы ярминкәсенең һәркайсында Тирсә халкының зур активлык белән катнашуын билгеләп үтте. Җитәкче шулай ук халыктан еш ишетергә туры килүче сорауга да тукталды. Ул  – авылдагы фермаларның ябылуына кагылышлы.

  • Моңа кадәр халыкның эшкә булган мөнәсәбәте белән фермаларны саклап калу мөмкин түгел иде. Бу хакта без хезмәтчәннәр белән дә очрашып сөйләштек. Алай эшләргә ярамый. Без моңа киләчәктә дә юл куймаячакбыз. Ә яз көне фермага таналар һәм симертү өчен үгезләр кайтартылачак, – дип хәбәр итте ул.  

 Халык үзен борчыган башка сорауларны да җиткерде. “Тирсәдә балалар мәйданчыгы булачакмы?” дигән сорауга уңай җавап алынды. “Спорт залына тренер кирәк” дигән үтенеч тә халык файдасына хәл ителде. Халыкның спорт белән шөгыльләнү өчен шартлар тудыруны хәстәрләве дә урынлы. Биредә балалар, яшьләр спорт белән актив шөгыльләнәләр һәм район, республика, хәтта ил күләмендә призлы урыннар яулыйлар.  

  • Безнең волейбол буенча көчле командабыз бар. Алар барлык ярышларда диярлек призлы урыннар яулыйлар. Январь аеннан старт алган спартакиадада да волейбол, армспорт, аркан тарту буенча беренче урынга чыктык. Максатыбыз – быел да авыл җирлекләре арасында абсолют җиңүче булу, – диде Рафил Закиров.

Муниципаль хезмәт ветераны Ләйсирә ханым Нәфыйкова авылда музей булдыру, авыл тарихын язу хыялы белән януын җиткерде.

  • Нинди зур авылда музей юклыгы күңелне тырнап тора. Югыйсә, Мәдәният йортында аны ясау өчен бүлмәләр дә бар. Без бу юнәлештә эшне башлап та җибәрдек инде. Тарихи материаллар туплау өчен сезнең ярдәм кирәк, авылдашлар, – дип мөрәҗәгать итте ул җыенда катнашучыларга.
  •  Мондый  очрашулар халык белән җитәкчелек арасындагы күперне ныгыту өчен бик тә кирәк. Җыеннан соң ике як та тиешле нәтиҗәләр ясарга тиеш. Уңышның нигезендә аралашып, аңлашып эшләү ята, – диде Альберт Хәбибуллин.

Җыен бүләкләүләр белән тәмамланды. Районның хәрби-диңгез флоты ветераннары оешмасы җитәкчесе Илфат Ямалиев хәрби бурычларын су асты көймәсендә үтәгән Фринил Галиев һәм Айнур Вәлиевка ТР Диңгез собраниесе исеменнән Рәхмәт хатлары тапшырды.  Ә авыл җирлегенең акчалата бүләгенә Яңа елга сыннар ясауда елның-елында  активлык күрсәтүче Илнар–Алия Сибатовлар гаиләсе лаек булды.

Белешмә:

2018 елда Тирсә авыл җирлегендә үзара салым акчаларына түбәндәге эшләрне башкару планлыштырыла: авыл җирлегенең генераль планын булдыру, авыл эчендәге юлларны ремонтлау, кышкы чорда урамнарны кардан чистарту, Тирсә, Наҗар, Мордывый авыллары зиратларын тәртипкә китерү.   

Дания АБЗАЛИЕВА.

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International