Әгерҗе спортчылары кул көрәше бәйгесеннән җиңүләр белән кайтты

Удмуртиянең Завьялово бистәсендә узган кул көрәше бәйгесендә Әгерҗе спортчылары да сынатмадылар, медальләр яуладылар.

Удмуртия Республикасы Кубогына узган ярышта барлыгы 13 командадан 100 спортчы катнашты. Командалар буенча ИжГТУның каты куллы егет-кызлары – беренче, Әгерҗе спортчылары – икенче, Завьялово спорт сөючеләре өченче урын алдылар.

Шәхси беренчелектә балалар-яшүсмерләр спорт мәктәбендә Руслан Закиров кулы астында шөгыльләнүчеләр – түбәндәге урыннарда:    

Рузилә Шаһиева, Дәниф Галиуллин – беренче, Святослав Тарасов, Арсений Чечетко, Динар Гомәров – икенче, Дмитрий Владимиров, Ленар Галиев, Батыр Чураев өченче урында.

Җиңүчеләргә медальләр, Мактау грамоталары һәм кыйммәтле бүләкләр тапшырылды.