Велоузыш катнашучылар саны буенча рекорд куйды

9 Май бәйрәме алдыннан Бөек Ватан сугышы корбаннары истәлегенә велоузыш уздыру районда матур традициягә әйләнде. Ул тәүге тапкыр Җиңүнең 70 еллыгына багышлап үткәрелгән иде. Шунысы сөенечле, анда катнашучылар саны елдан-ел арта бара.

Быел ул узышчыларның күплеге белән рекорд куйды. Барлыгы 300 спорт сөюче стартка басты бу көнне. Девәтернәдән алып Әгерҗегә кадәр барлык авыллардан диярлек укучылар, яшьләр, педагоглар велоузышка чыктылар.

ЧАЛЛЫГА КАДӘР БАРАБЫЗ

Иртәнге сәгатьләрдә үк спорт сөючеләр район хакимияте янындагы мәйданга җыелдылар. Велосипедларны КамАЗга төяп, бердәм команда старт биреләчәк Наҗар авылына юл тотты.

• Киләсе елга велоузышны Чаллыга кадәр уздырырга тәкъдим итәм. 150 чакрым ара безнең өчен үтә алмаслык юл булырга тиеш түгел, – диде янәшәмә утырган спорт сөюче.  

Аның тәкъдимен күпләр хуплады.

• Кечкенә чакта Әгерҗедән Ижауга кадәр велосипедта барганым һәм кире кайтканым – әле дә истә. Якынча йөз чакрым ара бит ул! – дип әйтеп куйды арадан берәү.

Старт биреләсе урында спорт сөючеләрне Тирсә авыл җирлеге башлыгы Рафил Закиров сәламләде.

• Безнең җирлек районда иң зурлардан санала. Кечкенә генә Наҗардан 230 кеше фронтка киткән, шуның 41енә туган якларга кайту насыйп булмаган, – диде ул илебезгә җиңү алып килгән батыр сугышчыларга тирән хөрмәтен белдереп.

Батырларны бер минут тынлык белән искә алып, һәйкәлгә венок салганнан соң, “Катюша“ны җырлый-җырлый Россия, Татарстан, Әгерҗе әләмнәрен, шулай ук Девәтернәдән үк алып килгән Җиңү байрагын тотып юлга кузгалдылар велосипедчылар. Сүз уңаеннан: Районыбызның иң ерак авылларының берсе булган Девәтернәдә бу көнне велоузышка старт иртәнге сәгать алтыда ук бирелгән иде. Әлеге мәктәп укучылары эстафетаны Кадыбаш балаларына, алар исәнбайлыларга тапшырдылар. Шулай итеп, күчмә байрак Наҗарга кадәр килеп җитте. Колоннаны Салагыш һәм Бима мәктәпләре директорлары Айдар Хөснетдинов һәм Эдуард Михайлов җитәкләделәр. Әлеге спорт сөюче җитәкчеләр велоузышта ел саен зур теләк белән катнашалар. Ә менә районда танылган педагоглар Фәйзуллиннар династиясе бу чарада катнашу өчен махсус кайтканнар.

БЕРЕНЧЕ ТУКТАЛЫШ

Тирсәдә узышчыларны район башлыгы Валерий Макаров каршы алды. Биредәге халыкның күплеге шаккаттырды. “Рәхим итегез!“, “Велоузышта катнашучыларга сәлам!“ дип язылган плакатлар, мактау сүзләре марафончыларга көч өстәми калмагандыр.

• Бөек Җиңүнең зур югалтулар бәрабәренә яуланганын беләбез. Батырларны онытырга безнең хакыбыз юк. Велоузышны да ел саен уздырып, анда катнашучылар сафын тагын да арттырачакбыз, – диде Валерий Владимирович.  
• Яшьләр әлеге чараның мөһимлеген һәм кирәклеген аңлыйлар. Менә шунысы сөендерә, – диде район мәгариф идарәсе начальнигы Вәсилә Сафиуллина.

Тирсә мәктәбе укучылары сөйләгән сугыш чоры шигырьләре, алар башкарган җырлар күңел кылларын тибрәтте. Тирсәлеләр узышта катнашучыларны тәмле солдат боткасы белән дә сыйладылар.

ТЕЛӘК КЕНӘ КИРӘК

Мордывый, Иж-Бәйки авыллары артта калды. Спорт сөючеләрнең йөзләре кояштай балкый. Кәефләре күтәренке. Хәтта иң нәни катнашучы – 9 яшьлек Глеб Семенов та апа-абыйларыннан калышмый.

• Бу чарада ул уздырыла башлаган беренче елларда ук катнашырга теләгем зур иде. Ара озынлыгы куркытты. Әмма биредә бөтенләй икенче мохит. Алҗуны сизмисең дә, – ди башкалар белән бер сафта баручы балалар иҗаты йорты методисты Алсу Шәрәфетдинова.

Иж-Бубый укучылары да узышчыларны җыр-биюләр белән каршы алдылар. Авыл башлыгы Раиф Ваһапов катнашучыларны бәйрәм белән котлады. Бергәләп фотога төшкәннән соң марафончылар Әгерҗегә юл тотты.

ИҢ МӨҺИМЕ – ХӘТЕР

Әгерҗедәге Мәңгелек ут янында вальс әйләнгәннән соң, сүзне әлеге велоузышны иң беренче тапкыр оештырган Юрий Чирков алды.

• Дүрт ел гына түгел, әлеге велоузышның дүрт дистә ел уздырылуын телим. Бу – бабаларыбыз истәлеген саклау, аларның батырлыгын онытмау бит. Шундый чаралар уздырып, без бу хәтерне киләчәк буынга тапшырабыз, – диде ул.

Катнашучылар велоузышны оештыручыларга, авыл башлыкларына, велосипедчылар колоннасын озатып барган ЮХИДИ бүлекчәсе хезмәткәрләренә, һәм аларның җитәкчесе Олег Капиловка олы рәхмәтләрен җиткерделәр.

• Җиңүнең 74 еллыгына багышланган велоузышта очрашканга кадәр, – дип саубуллаштылар алар.