Әгерҗе кибетләрендә аракы сату кими

Әгерҗе районында быелның дүрт аенда, узган елның шул чоры белән чагыштырганда, Татарстанда җитештерелгән алкоголь продукциясе сату кимегән. Район хакимиятендә узган киңәшмәдә җитәкчеләр, эшмәкәрләр һәм авыл җирлекләре башлыклары аның сәбәпләре турында сөйләштеләр. 

Саннарга күз салыйк. Дүрт айда район кибетләреннән барлыгы 11,1 мең декалитр (узган ел белән чагыштырганда 92 процент) аракы сатып алынган. Ә Татарстанда җитештерелгән алкоголь продукциясе 6,2 мең декалитр (90 процент) сатылган. Бер җан башына 3,2 литр (93 процент) спиртлы эчемлек туры килә.

•  Әлеге күрсәткечләр буенча без республикада 33нче урында барабыз, – диде территориаль үсеш бүлеге җитәкчесе Лилия Молчанова.

Әгерҗедә, авыл җирлекләрендә үзебездә җитештерелгән аракы ни өчен начар сатыла соң? Моның сәбәпләре төрле булырга мөмкин. Кибетнекен сатып алмыйлар икән, димәк, идән астыннан алып эчәләр. Киңәшмәдә катнашкан кайберәүләр шушы фикерне җиткерде. Быел Россия Эчке эшләр министрлыгының Әгерҗе районы буенча бүлеге полиция хезмәткәрләре законсыз төстә спиртлы эчемлекләр сату буенча ике җинаять эше ачкан. Ялган аракы сатучылар үз җәзасын алган. Бер кеше “Халык контроле“ системасына составында спирт булган сыекча сатучы турында хәбәр юллаган. Әлеге очрак расланган һәм хәбәр җибәрүчегә бер мең сум акчалата бүләк тапшырылган.

•  “Халык контроле“ системасына мөрәҗәгать итүдән курыкмасыннар иде. Анда хәбәр итүченең исеме ачылмый, ул аноним булып кала. Бергәләп тотынсак кына легаль булмаган аракы белән көрәшнең тамырын корыта алабыз, – диде ТР Дәүләт алкоголь инспекциясенең Чаллы территориаль органы җитәкчесе Гөлшат Вафина.

Тирсә, Иске Эсләк, Шаршады, Бима, Яңа Бәзәкә, Кадрәк, Тәбәрле, Көчек, Иске Эсләк, Кичкетаң авыл җирлекләрендәге кибетләрдә аракы сату күпкә кимегән. Ни өчен? Район башкарма комитеты җитәкчесе Андрей Авдеев һәр авыл җирлеге башлыгыннан аңлатма бирүен таләп итте.

•  Кичкетаңның үзендә генә алты кибет эшли. Аның бары берсендә генә алкоголь продукциясе сатыла. Ул кибет тә сәгать дүрттә ябыла. Халык, аракының арзанлыгына кызыгып, өч чакрымда гына урнашкан Удмуртия авылына йөри, – диде Кичкетаң авыл җирлеге башлыгы Зөлфәт Нуриев.
•  Авылларда күпчелекне пенсионерлар тәшкил итә. Халык саны кими. Яшьләр авылларда төпләнми. Аннан соң Кам.Ключта райпо кибете сәгать дүрткә кадәр генә ачык була. Сатучысы да күрше авылдан килеп эшли, – дигән сәбәпне атады Азево авыл җирлеге башлыгы Владимир Семенов.

Боларына өстәп шуны да әйтергә кирәк: халык акрынлап булса да эчүдән бизеп бара. Мәсәлән, үземнең танышларым арасында гына да аракыдан баш тартучылар арта. Элек авылларда утын, печән китергән, бакча сукалаган, бәрәңге өйгән һәм башка шундый эшләр өчен бер ярты алалар иде. Хәзер авыл кешесе гаиләсен ничек туендыру турында кайгырта, күбрәк акча эшләү ягын карый. Абзарында мал да асрарга, үзе җитештергән продукцияне сатып азмы-күпме керем дә алырга тырыша. Әмма аның бәясе генә ташка үлчим. Мәсәлән, авылларда бүгенге көндә сөтнең бер литрына 13 сум белән исәп-хисап ясыйлар. Исәпләп карасак, 300 сумлык бер ярты аракы алу өчен аңа 23 (!) литр сөт сатарга кирәк. Хезмәт хакы буенча тоткарлыклар булу, бик аз акча алып эшләү... Бәлки, кайбер сәбәпләр шушыдыр...

Ххх

Бик тиздән туган якта милли бәйрәмебез – Сабан туе гөрләячәк. Бәйрәмдә, әлбәттә, күпләр күңел ача, кәеф-сафа кора. Спиртлы эчемлекләр сайлаганда үзебезнекенә – Татарстанда җитештерелгәненә өстенлек бирсәгез иде.