Күләгәшнең беренче комбайнчысы олуг юбилеен бәйрәм итте

2018 елның 16 августы, пәнҗешәмбе

Күләгәштә гомер кичерүче заманында авылның иң беренче һәм күп еллар алдынгы комбайнчысы булган Елисей МЕРЗЛЯКОВ 90 яшьлек олуг юбилеен да яшь чагындагы кебек күтәренке кәеф, юмор хисе белән каршы алды.

Үзен бәйрәме белән котларга килгән район башкарма комитеты җитәкчесе урынбасары Римма Гыйльметдинова һәм Күләгәш авыл җирлеге башлыгы Юрий Васильевны да әңгәмә барышында кызык сүзләр әйтеп көлдереп алды.

• Әнием 99 яшенә кадәр яшәде. Әле сез мине 95тә дә, насыйп булса 100 яшемдә дә котларга килерсез, диде.

...Җиде балалы гаиләдә бик иртә тормыш арбасына җигелә Елисей. Сугыш елларында колхозда эшләп чыныгу алган егетне берничә елдан яңа комбайн алырга җибәрәләр.

• Ул көн бүгенгедәй күз алдымда. Уракка төшәр вакыт якынлашкан көннәр иде. Руль артында кайтучы авызы колагына җиткән егетне котларга, тимер атны карарга бөтен авыл җыелды. Менә шул комбайнда ничә еллар эшләдем икән мин?! Колхозда гына түгел, районда алдынгы комбайнчы булдым, – ди ул хезмәт елларын искә төшереп.

Булачак хатыны Людмила белән дә кырда танышалар һәм озак та үтми өйләнешеп куялар. Гаиләдә бер-бер артлы биш кыз дөньяга килә.

• Мин әтинең безне орышканын хәтерләмим. Әни кырысрак булса, әти киресенчә тыныч, ипле, акыллы, зирәк иде. Эшләрне төгәлләгәч кичләрен үзе янына җыелышкан без кызларына кычкырып китап укыган мизгелләрне әле дә сагынабыз. Барыбызга дәрес хәзерләргә булышырга да вакыт тапты. Дөрес, без аны урак вакытында өйдә сирәк күрдек. Ул таң белән чыгып китә, бик соң гына кайта иде. Ә бер-ике көн  күрмәсәк, юксына башлый идек, ди Бимада яшәүче кызы Зоя.

Хәзер дә китап-журналлар укырга ярата Елисей Иванович. Бик күп мәзәкләр белә, тормышта ямь табып яши.

Кызлар күптән инде туган йорттан очар кошлар кебек таралышканнар. Һәрберсенең үз гаиләсе. Елисей дәдәйнең 16 оныгы, 14 оныкчыгы бар инде. Моннан тугыз ел элек җәмәгате вафат булгач, балалары аны бер генә минутка да ялгызын калдырмыйлар. Хәзер аны Чаллыда яшәүче кызлары тәрбияли. Туган авылы, гомер иткән нигезен сагынып яшәүче әтиләрен атна саен диярлек Күләгәшкә алып кайталар.

• Кызларым бик яхшы минем, кияүләрем дә алтын кебек. Өрмәгән җиргә дә утырмыйлар. Картлыгымның шулай бәхетле узуына бик сөенәм, ди Елисей Иванович.

Миләүшә ЯГЪФӘРОВА.