Иж-Бубый укучылары Бубый елгасы башланган урынга сәяхәт иттеләр

2018 елның 20 августы, дүшәмбе

“Бубилар мирасы“ иҗтимагый оешмасы җитәкчесе Искәндәр Җиһангәрәев җитәкчелегендә туган авылы Иж-Бубыйның бер төркем егет-кызлары инде өченче ел рәттән җәй көне җәяүле сәфәргә чыгалар. Быел алар Бубый елгасы башланган урынга сәяхәт кылганнар.

Яшь сәяхәтчеләр Диләрә Ваһапова, Зөлфия Чигвинцева, Ленар Нәфыйков, Муса Мәннапов, Артур Әнвәров, Алия Чураева белән бергә 50 чакрымга сузылачак ерак юлга мәгариф ветераны Раиф абый Гәрәев та кузгала.

•  Минем өчен бу сәфәр аеруча истәлекле. Чөнки нәкъ 50 ел элек, мәктәптә 7 сыйныфта укыганда әлеге урынга мәктәп директоры – география укытучысы Сәлим Гайфуллин җитәкчелегендә барган идек. Ә икенче тапкыр үзем 7 сыйныф укучыларын алып бардым, – ди Раиф Мөхәммәтҗан улы.

Сәфәрчеләрнең юлы әлеге елга буйлап төрле авыллар аша уза.

• Без алар аша үткәндә һәр нәрсәгә игътибар итәргә тырыштык. Әйтик, тарихи каберлекләр күрсәк тә тукталдык, чиркәүләрне күзәттек, табигать матурлыгына сокландык. Яшермим: юлыбызда ямьсез, ягъни чүпле урыннар да еш очрады. Аларын чистарттык, – ди Зөлфия.

Кыз җәяүле сәфәргә өченче ел рәттән чыккан инде.

• Беренче сәфәребез Данилово авылына булган иде. Ул хәзер Удмуртиянең Кыяс районына карый. Элек Иж-Бубый авылы Вятка губернасы, Сарапул өязе, Данилово волостена кергән. Икенче елныСебер тракты буйлап Сарапулга сәяхәт кылдык. Бу юлы – елгабыз башланган урынга. Җәяүле юл арытса да, андагы мохит ел буена җитәрлек тәэсирләр бүләк итә безгә, – ди ул. – Бер-беребез белән юл буе нинди генә темаларга рәхәтләнеп сөйләшмибез?! Арысак, туктап ял итәбез. Ә нинди генә уеннар уйнамыйбыз?! Кичен гитара уйнап җырлаган мизгелләр генә ни тора!
• Ә үзебез әзерләгән ризык табигать кочагында ничек тәмле!  – дип кушыла Диләрә. 

Ике көн палаткаларда кунарга туры килгән сәяхәтчеләргә. Беренче көнне буа янында палатка корганнар.

• Анда балыкчылар бик күп иде. Аларны күзәтү үзе бер рәхәтлек бирде, – диләр егетләр-кызлар.

Ә икенче көнне Бубый елгасы башланган урында йоклаганнар.

• Безнең Бубый елгасы ерымнан бәреп чыккан чишмәдән башлана икән. Җирле халык аны Буби шур дип атап йөртә. Җирле халык дигәнебез – Яңа Бия авылы халкы.  Әлеге авыл Пычастан биш чакрым ераклыкта урнашкан, – диләр сәяхәтчеләр. – Ул урында бер кызыклы гамәл дә эшләп алдык. Һәрберебез “20 елдан соң ни булыр?“ дигән сорауга җавап язып, аны шешә эченә тыгып күмдек. Нәкъ шуның кадәр вакыт узгач, 2038 елның 8 августында, барыбыз бергә шул урынга яңадан сәяхәт кылырга сүз куештык. Менә шул вакытта әлеге язуларны кабат укып, кемнең фаразы туры килү-килмәвен беләчәкбез.

Менә шундый онытылмас сәяхәт булган ул. Аның һәр мизгелен фотога төшергәннәр һәм бик тиздән альбом итеп туплаячаклар.

• Ә алдагы елда Иж белән Кама кушылган урынга сәфәр кылырга ниятләп торабыз, – ди Искәндәр.
• Ә без инде бүгеннән үк әлеге сәяхәтне көтә башлыйбыз, – диләр егетләр-кызлар.       

Ххх

Язманы әзерләгәндә редакциягә Диләрәнең әнисе Эльза ханым шалтыратты.

• Вакытын һәм көчен кызганмыйча безнең балаларга күтәренке кәеф, онытылмас мизгелләр бүләк иткән игелекле эшмәкәр Искәндәр Рөстәм улына барлык ата-аналар исеменнән олы рәхмәт әйтәсебез килә. Аларның сөенече Сезгә бәхет, сәламәтлек, эшегездә уңышлар  булып әйләнеп кайтсын, – диде ул.

Дания АБЗАЛИЕВА.