Тирсә мәктәбендә Парламент дәресе узды
“Республикабызның барлык мәктәпләрендә Парламент дәресләре уздыру матур бер традициягә әйләнде. Ул 2009 елда бирле үткәрелеп килә. Укучылар да әлеге дәресләр белән бергә үсәләр“, – дип башлады чыгышын Тирсә мәктәбендә узган Парламент дәресендә ТР Дәүләт Советы депутаты Альберт Хәбибуллин.
Әлеге дәреснең быелгы темасы “Парламент. Җәмгыять һәм мин“ дип атала иде. Халык илчесе укучыларга республика хакимиятенең закон чыгару органының тоткан урыны һәм бурычлары, иҗтимагый-сәяси тормышта актив катнашуы турында, тормышыбызда Законның нинди зур әһәмияткә ия булуы хакында аңлатты.-
Иң беренче чиратта, дәресләр законнарны белү, актив тормыш алып бару, сәләтле яшьләрне табу, уңышлы проектлар булдыру өчен кирәк, диде ул.
-
Депутатлар биш елга сайланалар һәм алар Татарстан Конституциясен кабул итүдә, Татарстан бюджетын раслуда, законнар чыгаруда, аларга төзәтмәләр кертүдә актив катнашалар, диде.
-
18 яшегез тулгач сез дә тәүге тапкыр сайлауга барачаксыз. Бу сезнең гражданлык бурычы, – дип йомгаклады ул сүзен.
-
Әлеге дәресләрнең төп максаты укучыларга киләчәктә кирәкле белемнәр бирү. Сез дә, мәктәп тәмамлап, мөстәкыйль тормышка аяк басарсыз. Шул вакытта законнар белү дә кирәк булачак. Ә әлеге дәресләр, беренче чиратта, актив тормыш алып бару, сәләтле яшьләрне табу, уңышлы проектлар булдыру өчен кирәк, – диде район башлыгы Валерий Макаров.
-
Киләчәк яшьләр кулында. Шуңа күрә активлыгыгызны хәзердән үк күрсәтә башлагыз. Иреклеләр, волонтерлар сафларына басып үзегезне үстерә аласыз, – диде ул.