Әгерҗелеләр «Татарча диктант» акциясенә кушылды
Шимбә көнне әгерҗелеләр дә дөнья күләмендә уздырылган «Татарча диктант» акциясенә кушылды.
Район үзәк китапханәсендә 51 кеше, шуларның унысы – укучылар Гаяз Исхакыйның «Көз» әсәреннән өзек яздылар. Текстны безнең районда әлеге акцияне оештыручы – район мәдәният бүлеге җитәкчесе Марс Гатауллин укыды.
Диктант язарга килүчеләр арасында китапханәчеләр, татар теле мөгаллимнәре, төрле учреждение-предприятиеләрдә эшләүче милләттәшләребез бар иде. Резидә Каюмова, мәсәлән, Красный бордан ук килгән.
- Гомер буе укучыларның белемен тикшерәбез. Үземнекен дә сынап карыйсы килде, - диде ул.
Ә Әгерҗедән килгән Зәлидә Гыйрфанова мәктәп тәмамлаганнан бирле 30 ел диктант язганым юк, диде. Ул татарча әдәби китаплар укуын, күпләп газета-журналлар яздыруы турында да сөйләде.
1нче гимназиянең 9 сыйныф укучылары Алия Тукманова һәм Гөлназ Рәшитова өйдә дә, мәктәптә дә татарча гына аралашуларын әйттеләр. Татар теле буенча олимпиадаларда да катнашканнары бар икән аларның.
Диктант нәтиҗәләре ноябрь аенда билгеле булачак.