Кадыбаш мәктәбенә – 120 ел

2018 елның 30 ноябре, җомга

Кадыбаш мәктәбендә уку йортының 120 еллык юбилеена багышланган тантана узды.

Мәктәп коллективы кунакларны ишек төбендә халыкыбызның милли ризыгы – чәк-чәк белән каршы алды. Кунаклар дигәнебез – район җитәкчеләре, мәктәптә төрле елларда белем биргән мөгаллимнәр, ветеран укытучылар, мәктәпне төрле елларда тәмамлаган укучылар. Кунакларга кабинетлар буйлап, мәктәпнең тарих музеена сәяхәт кылу мөмкинлеге тудырылды. Һәр кабинетта укучылар каршы алды һәм таныштырды.

Тантананың беренче өлеше мәктәп тарихына багышланды.  Бу өлештә моннан бер гасыр элек мәктәпкә нигез салынган вакытлар да, авыр сугыш еллары да, пионерлар хәрәкәте дә күз алдыннан үтте. Укучы һәм укытучыларның музыкаль чыгышлары белән үрелеп барган бәйрәм тамашачыларга тарихны барлау мөмкинлеге белән бергә күңелгә рухи ял да бүләк итте.    

Кадыбаш мәктәбенең 120 еллыгына багышланган тантананың икенче өлеше “Укытучы – якты маяк" дип аталды.

Исеменнән үк күренгәнчә, бу өлеш мөгаллимнәрне зурлау-данлауга багышланды. Аның барышында вафат булган укытучылар искә алынды, лаеклы ялдагы  мөгаллимнәр сәхнә түрендә хөрмәтләнде. Шулай ук бүген хезмәт куючы укытучыларга төрле дәрәҗәдәге бүләкләр тапшырылды. Алар бүләкләрне район башлыгы урынбасары Ришат Нурисламов, район мәгариф идарәсе начальнигы Вәсилә Сафиуллина кулыннан кабул итеп алдылар. Гомумән, бәйрәмдә бүләкләүләр бик күп  булды. Сәхнәгә күтәрелгән һәркемгә истәлек бүләкләре, чәчәк бәйләмнәре тапшырылды.  Искиткеч җылы итеп әзерләнгән бәйрәм һәркемнең күңеленә тирән эз салып, бер тында узды.   

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International