Кечкенә генә Наҗарда туксан яшьләрен тутырган ике тыл ветераны яши

2019 елның 30 гыйнвары, чәршәмбе

Тирсә авыл җирлегенә караган кечкенә генә Наҗар авылында туксан яшьләрен тутырган ике тыл һәм хезмәт ветераны яши.

Аның берсе – Гөлсем апа Мөбинова. Аңа инде 93 яшь. Ә Наилә апа Зәйнетдиновага шушы көннәрдә 90 яшь тулды. Бу апалар туганнар да әле. Гомер буе туган авылларында сөенеп-шатланып гомер кичергәннәр.

Хәзер дә җәй җитүен, тизрәк күрешү мизгелләрен көтәләр алар. Ни өчен дисезме?! Наилә апа кышны Әгерҗедә яшәүче кызы Альбира белән кияве Мулланур тәрбиясендә чыга. Олуг юбилеен да өч кызы Альбира, Диләрә, Айсылу, кияүләре, онык-оныкчыклары, бертуганы Гамир, аның җәмәгате Гөлфирә белән бергә каршылады Наилә апа.

Аны район башлыгы урынбасары Ришат Нурисламов, Тирсә авыл җирлеге башлыгы Рафил Закиров та котлап бүләкләр тапшырдылар. “Өмет“ халыкка социаль хезмәт күрсәтү бүлеге начальнигы Ольга Еремина да юбилярга иң матур теләкләр җиткерде. Һәр кунак белән ачылып сөйләшкән, бик тә ягымлы һәм сөйкемле Наилә апага күз тимәсен!

Күп еллар терлекчелектә эшләп лаеклы ялга чыга ул. Җәмәгате Хаҗи белән бик матур гомер юлы узалар. Әле бакчага чыкмаганына да өч кенә ел Наилә апаның. Моңа кадәр хуҗалыктагы бөтен эшне үзе башкарган.

  • Әнкәй без кайтуга мич тутырып камыр ризыклары пешереп куя иде. Мунчасы ягылган, өе җыелган була иде. Без аның янында кунак кына булдык, – диләр кызлары.

Хәзер үзләре әниләрен кунак өендә яшәтәләр. Җәй җитсә, туган йортка эзне суытмыйлар кызлар.

  • Мин гомер көземнең бик рәхәттә узуы белән бәхетле. Ходай бөтен кешегә дә минеке кебек бәрәкәтле, тыныч, матур картлык бүләк итсен, – дип тели Наилә апа.   
ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International