Әгерҗедә фашит концлагерьларыннан тоткыннарны азат итү көнен искә алдылар

2019 елның 12 апреле, җомга

Кичә фашист концлагерьларыннан тоткыннарны азат итү көне иде. Шул уңайдан “Өмет“ халыкка социаль хезмәт күрсәтү үзәге җитәкчесе Ольга Еремина, Әгерҗедә яшәүче Валентина Титова янына барып, күчтәнәчләр тапшырды.  

Валентина Александровна – әлеге категориягә керүче бердәнбер райондашыбыз. Ул сугыш башланыр алдыннан Ленинград өлкәсендә туган.

• Әнием сөйләве буенча әтине сугыш башлануга фронтка алганнар. Немецлар килгәч әнине, 2 яшьлек апам белән мине Петрозаводск шәһәренә концлагерьга алып киткәннәр. Без тимерчыбык белән уратып алынган салкын баракларда яшәдек. Ачлыктан интеккәнебез истә, – дип искә ала Валентина Александровна.

Алар концлагерьда 1945 елга кадәр, совет гаскәрләре азат иткәнче булалар.

Әтисе сугыштан кайткач озак тормый, авырып вафат була. Әнисе депода эшли. Валентина мәктәптән соң заводка эшкә урнаша һәм лаеклы ялга чыкканчы шунда эшли. 2006 елда Әгерҗегә күчеп килә. Валентина Титованың кызы да Әгерҗедә яши.