Әгерҗенең Вокзал урамының бер өлеше чүпкә баткан

2019 елның 15 апреле, дүшәмбе

“Әгерҗе хәбәрләре“ газетасы редакциясенә шәһәрнең түбәнге өлешендә яшәүче бер ир-ат мөрәҗәгать итте. Ул безгә фотолар да алып килде.

Эш шунда, Вокзал урамындагы элеккеге 9, 10нчы бараклар янәшәсе чүплеккә әверелгән.

• Шәхси секторда яшәүчеләрнең иртәнге якта эшкә барганда пакет белән чүпләрен ташлауларына йөрәк әрни, – дип сөйли Алексей. – Үземнең дә берничә хатын-кызны әлеге гамәлне башкарудан тыеп калганым булды. Һәр якшәмбе чүп түгү машинасы шәхси секторларга килә. Шуны көтеп алып булмый микәнни? Әлеге юлдан үзебез, балаларыбыз йөри бит. Биредә хәзер этләрне дә еш күрергә була. Балалар мәктәптән кайтканда алардан куркалар.

Кыш буе әлеге чүплек зурайганнан-зурайган. Этләр дә, җил дә әлеге пакетларны таратуга зур “өлеш керткән“.

Шунысы бигрәк тә күңелне әрнетә, әлеге ямьсез күренеш тимерьюлчылар шәһәре икәнебезне раслап торучы тарихи паровоз янында бит. Биредә бертуктамый поездлар йөреп тора. Безнең шәһәр турында чит төбәкләрдән халыкның фикере нинди икәнен чамалавы кыен түгел.