Сак булыгыз!

Хастаханәнең йогышлы авырулар бүлеге мәгълүматларына караганда, быел районның дәвалау учреждениеләренә талпан кадалып 17 кеше мөрәҗәгать иткән.  Тикшерелгән талпаннарның 3сенең төрле вируслар йөртүе ачыкланган. “Безнең районда лаборатория юк, шуңа талпанның зыянлымы-юкмы икәнлеген белү өчен без Ижауга (Ленин урамы, 106нчы йорт) юллыйбыз. Ни кызганыч, күпләр киңәшебезгә колак салмыйлар һәм кадалган талпанны тикшерергә алып бармыйлар. Шул рәвешле, үз сәламәтлекләрен  куркыныч астына куялар”, – ди  йогышлы авырулар бүлеге мөдире, табиб-эпидемиолог вазифаларын башкаручы Лилия Хөсәенова.

×××

“Кинәт кенә җылытып җибәрү сәбәпле, соңгы көннәрдә талпаннар аеруча котырды. Шуңа күрә райондашларыбыз саклану чаралары турында онытмасыннар иде”, – дип кисәтәләр табиблар.

Ә менә Әгерҗенең Җиңү паркында һәм “Имәнлек” ял итү зонасында курыкмыйча йөри аласыз. “Май бәйрәмнәре алдыннан әлеге ял итү урыннарында талпаннарга каршы эшкәртү чаралары уздырылды”, – ди шәһәр башкарма комитеты җитәкчесе урынбасары Раил Ваһапов.