Европа чемпионатыннан – медаль белән

Универсиадага санаулы гына көннәр калып барганда республика спортчыларының төрле ярышларда җиңүләр яулавы куандыра. Ә алар арасында Әгерҗе егет-кызларының да булуы безнең өчен икеләтә шатлык.

Әнә, Литвада армспорт буенча Европа чемпионатында Россия составында катнашкан каты куллы кызларыбыз – Әгерҗедән Ләйсән Гобәева, Көчектән инде Европада гына түгел, ә Дөнья чемпионатында үзен сынаган Миләүшә Гыймранованың җиңүләрен ишеткәч, сөенечтән күзгә яшьләр килде. Бу атнада районыбыз горурлыгы булган бу спортчыларны һәм аларны олы бәйгегә әзерләгән тренерлары Руслан Закировны поезддан каршы алырга әти-әниләре, балалар-яшүсмерләр спорт мәктәбеннән Наталья Мөхәммәтҗанова һәм Гөлназ Җиһангәрәева килгәннәр иде. Кызлар поезддан төшүгә аларны котлау, кочаклап күрешүләр башланды. Әниләре шатлыклы күз яшьләрен дә тыя алмадылар.

Спортчыларыбыз белән чемпионаттан алган тәэсирләрен уртаклашабыз. Ярышта Россия җыелма командасы составында иң көчле 105 спортчы катнаша. Беренче көнне үк Россия лидерлыкны үз кулына алган. Бу көнне россиялеләр 40 алтын медальнең 20сен яулаганнар. Гомумән, 26 илдән килгән көндәшләре арасында алар барлыгы 8 категория буенча беренчелекне алганнар. Әлбәттә, бу уңышларда Әгерҗе кызларының да өлешләре зур.

Мондый зур бәйгедә үзен беренче тапкыр сынаган 1нче гимназиянең 10 сыйныф укучысы Ләйсән ГОБӘЕВА, 50 килога кадәр үлчәү авырлыгында уң кулы белән барлык көндәшләрен җиңеп, I урынга күтәрелә. “Бу җиңүне үзем дә көтмәдем. Башта әллә ярышка бармыйм микән дип тә уйлаган идем. Ә җиңгәч миннән дә бәхетлерәк кеше булмады”, – ди алтын медаль яулаган кыз. Сул кулы белән ул Украина һәм Россия спортчыларына гына бирешә һәм III урын ала. “Ләйсән телефоннан бу сөенече белән уртаклашкач елап җибәрдек. Моңа кадәр Россия күләмендәге бәйгеләрдә катнашкан кызымның Европа буенча чемпион калуы – зур бәхет бит ул”, – ди Зәлия ханым.

Ә Көчек кызы – спорт мастеры Миләүшә ГЫЙМРАНОВАның әти-әнисе Раушания һәм Әнвәр инде кызларының мондый ярышларга йөрүләренә күнеккәннәр. “Ул ярышка киткәч Интернетны сүндергәнебез дә юк. Бөтен мәгълүматны белеп, кызыбыз өчен борчылып торабыз”, – ди Раушания ханым. Бу – Миләүшәнең Европа чемпионатында өченче тапкыр үзен күрсәтүе. Алдагы елларда Төркиядән – алтын һәм көмеш, Польшадан бронза медаль белән кайтты ул. Ә бу ярышта ике кулы белән дә II урын алды. Миләүшә моңа кадәр 50 килога кадәр үлчәү авырлыгындагы көндәшләре белән кул көрәштерсә, бу юлы 55 килога кадәрлеләр белән көч сынаша. Әлеге категориядә 55 спортчы була. “Кемнәр белән кул көрәштерәсемне белгәч, III урын алсам да риза булыр идем дип теләдем. Әмма уң кул белән – Россия, сул кул белән Төркия спортчыларына гына бирештем. Мин бик шат”, – ди көмеш медаль иясе. Шулай да кызлар Россиядән кала Төркия, Украина, Швециядән килгән яшьтәшләренең бик көчле булуларын әйттеләр. Әмма безнекеләр әле аларга бирешергә уйламыйлар. Афәрин!
Кызлар ярышлар узган Друскининкай шәһәре турында да сөйләп шаккатырдылар. Зур булмаган курорт шәһәрендә заманча отельләргә, аквапаркларга, биюче фонтанга сокланганнар алар. Шәһәр буйлап сәяхәт иткәннәр. Дүрт йолдызлы отельдә яшәгәннәр, башка илләрдән килгән яшьтәшләре белән аралашканнар. “Без бер-беребезгә көндәшләр итеп түгел, ә дуслар итеп карыйбыз. Инглиз телендә аралашабыз, бер-беребезнең уңышлары өчен сөенәбез. Кем көчле – җиңү шуңа эләгә. Пьедесталга күтәрелү өчен җиде кат тиреңне чыгарып шөгыльләнергә кирәк”, – ди Миләүшә. Ә аны алда мөһим бердәм дәүләт имтиханнары көтә. Аларда да сынатмас спортчы кызыбыз. Аннан соңгы тормышын да ул спорт белән бәйләргә тели. Уңышлар сиңа, Миләүшә!

Ә Ләйсән быел 10 сыйныфны тәмамлый. Аның әле кул көрәше буенча беренче адымнарын гына ясый башлаган сеңлесе Зилияне өйрәтергә, үзенә дә спорт белән ныклап шөгыльләнергә бер ел вакыты бар.

×××

XXIII Европа чемпионатында катнашкан кызларыбыз Ләйсән белән Миләүшәнең исемнәре район тарихына алтын хәрефләр белән язылырга тиеш. Чөнки мондый спортчылар районда бармак белән генә санарлык. Шуңа күрә район җитәкчелеге, спорт бүлеге аларга игътибарны тагын да арттырсын иде. Чөнки спортчы кызларны алда тагын мөһим бәйге көтә. Алар сентябрь аенда  Дөнья чемпионатында катнашачаклар.



Миләүшә ЯГЪФӘРОВА.