Хыяллар чынга ашты

“ЛУКОЙЛ“ нефть  компаниясе һәм «РИТЭК» җәмгыяте җитәкчелеге Казанда Универсиада авылындагы Халыкара мәгълүмат үзәгендә 4нче  республика социаль һәм мәдәни проектлар конкурсында җиңүчеләрне тәбрикләде. Быелгы конкурста безнең районнан  “Бубыйлар мирасы“ иҗтимагый оешмасы, 4нче шәһәр һәм Тәбәрле мәктәпләре әзерләгән проектлар җиңү яулады.
   
Әлеге нефть компанияләре Татарстанда  мондый бәйгене дүртенче тапкыр уздырдылар. Безнең районнан да анда катнашучылар елдан-ел арта.

– Быел гына да әлеге бәйгегә утызлап оешма мөһим проблемалар буенча проектлар әзерләп җибәргән иде. Менә шуларның өчесе иң лаеклы дип табылды. Аларның хыяллары чынга ашты. Җиңүче оешмалар нефтьчеләрнең бу олы бүләгенә проектларында күтәрелгән мәсьәләләрне хәл итәчәкләр,– ди район башкарма комитеты җитәкчесе Римма Гыйльметдинова.

Әйдәгез,  танышыйк әле, җиңүчеләр конкурста җиңеп алган грантларына нәрсәләр эшләргә планлаштыралар икән?

Гәрәев Раиф ”– “Бубилар мирасы“ иҗтимагый оешмасының башкарма директоры: Без узган ел да 300 мең сум грант отып музеебызда шактый эшләр башкарган идек. Быел менә тагын 300 мең сум грант отуыбызга сөенеп туялмыйбыз. Бу акчага музейда бер мәдрәсә сыйныфы җиһазларга ниятләп торабыз.

Тимерашева Надежда – 4нче шәһәр мәктәбе директоры: Без “Экология“ номинациясендә “ЭКО-сумки“ проекты белән 30 мең сум грант оттык. Әлеге акчаның 20 меңенә тегү машинасы, 10 мең сумына ЭКО-сумкалар тегү өчен материал сатып алачакбыз. Күпләр яратып куллана торган полиэтилен сумкаларның зарары турында халык арасында аңлату эшләре алып барып,  махсус материалдан сумкалар тегеп, аларны шәһәрдәшләребезгә тарату акциясе оештырачакбыз.

Нәбиуллина Илзидә – Тәбәрле мәктәбенең технология укытучысы: Без дә “Экология“ номинациясендә “Алтын балык“ проекты белән катнашкан идек. 28 мең сум грантка биология кабинетына аквариум һәм декоратив гөлләр алырга планлаштырабыз.

Нефть компаниясе оештырган бу конкурсның бүләкләү тантанасына безнең районнан 45 кеше барган иде.

– Башкалар да  үзләрендәге социаль мәсьәләләрне тормышка ашыру өчен нефть компанияләренең нинди мөмкинлекләр тудыруын күрсеннәр һәм алдагы елларда да бу бәйгедә катнашсыннар өчен иң актив хезмәткәрләрне алып барырга булдык. Бу бәйрәмне, җиңүчеләрне хөмәтләүне үз күзләре белән күргәч, һәрберсенең күңелендә конкурста катнашу теләге тугандыр дип уйлыйм,– диде Римма Гыйльметдинова.

Әйе, “ЛУКОЙЛ“ һәм “РИТЭК“ хыялларны чынга ашыру мөмкинлеге тудырганда аннан файдаланып калырга кирәк. Алдагы елда бу бәйгедә башкаларга да грантлар отып, планнарын тормышка ашырырга язсын.