Быел Татарстан гаиләләренә ана капиталы сертификатлары буенча 8, 81 миллиард сум акча күчерелгән

  Ана капиталы турындагы закон гамәлгә ашырыла башлаганнан бирле, ана капиталына барлыгы 146 мең 803 данә сертификат бирелгән. 2013 нче елда исә мондый 25 мең 600 сертификат тапшырылган. Әлеге мәгълүматларны бүген Россия Федерациясе Пенсия фондының Татарстан Республикасы буенча бүлегенең узган 2013 нче елгы эшчәнлеккә йомгак ясау һәм агымдагы 2014 нче елга бурычлар билгеләүгә багышланган коллегия утырышында, Пенсия фондының ТР буенча бүлеге идарәчесе Марсель Имамов җиткерде. Коллегия утырышы ТР Премьер-министры Илдар Халиков катнашында узды.

Аның сүзләренә караганда, закон көченә кергәннән бирле, ана капиталы сертификатлары буенча 32 миллиард сумнан артык акча күчерелгән. 2013 нче елда ул 8, 81 миллиард сум тәшкил итә. Ана капиталы акчасыннан барлыгы 96 мең 659 гаилә файдаланган, шул исәптән, 2013 нче елда – 24 мең 26 гаилә. 94 меңнән артык гаилә сертификатны торак шартларын яхшырту өчен кулланган, 36 гаилә бу акчаны пенсиянең тупланма өлешенә юнәлткән, 2 мең 452 гаилә аны баланың белеме өчен файдаланган.

Марсель Имамов хокук саклау органнары белән берлектә ана капиталы белән бәйле законсыз гамәлләр тикшерелеп торырга, сертификат чараларының сарыф ителеше мәсьәләсендә контроль көчәйтелергә тиешлеген ассызыклады.


(Казан, 16 гыйнвар, “Татар-информ”, Гөлнар Гарифуллина).