Яшьләр йортлы булды

Әгерҗедә 13 меңнән артык балалар, яшүсмерләр һәм яшьләр исәпләнсә дә, моңа кадәр Яшүсмерләр клубыннан тыш аларга җыелып, файдалы эш белән шөгыльләнү, күңел ачу өчен махсус урын юк иде. Ниһаять, районыбыз яшьләренең үз йортлары булды. Гагарин урамындагы “Авангард“ кинотеатры бинасын Яшьләр үзәге итеп үзгәртеп кору инициативасы белән чыккан район башлыгы Валерий Макаровны республика җитәкчелеге дә хуплый. Узган ел Министрлар Кабинеты карары белән үзгәртеп кору эшләренә 10 миллион сум акча бирелә. Тигран Агаджанян җитәкчелегендәге “Строй-Гигант“ предприятиесе төзүчеләре бу ташландык бинадан чәчәк ясаганнар. Яшьләр үзәген ачу тантанасында Фәрит Мөхәммәтшин үз чыгышында:

– Әгерҗенең үзәгендә ничә еллар халыкка кино хезмәте күрсәткән бу бина бүген икенче яшьлеген кичерә. Аның тышкы ягыннан ук яшьлек бөркелеп торырга тиеш. Бу Үзәк иртәдән алып төн урталарына кадәр яшьләр авазыннан тынып тормасын иде. Ул Әгерҗе яшьләренең иң яратып йөри торган урынына әверелгәндә генә максатыбызга ирештек дип әйтә алачаксыз, – дип Яшьләр үзәге җитәкчелегенә хәер-фатихасын бирде.

Яшьләр үзәге директоры Айзат Харисов:

– Безнең төп максат – яшьләрнең талантын, сәләтен ачып, аны үстерү, яшьләрне иҗатка, актив җәмәгать тормышына тарту, буш вакытларын биредә файдалы һәм нәтиҗәле итеп оештыру, аларны берләштерү, дуслаштыру. Яшьләр өчен бөтен чаралар биредә оештырылачак. Бер тапкыр мондагы чарада катнашкан егет-кыз, соңыннан көн саен бирегә атлыгып торырлык итеп эшләү бурычын куябыз, – диде.

Кунаклар, Яшьләр үзәгенә үтеп, мондагы матурлыкны сокланып карап йөрделәр. Биредә “Авангард“ның элекке чакларын хәтерләтеп, кино залында фильмнар да күрсәтеләчәк.

 – Бүгеннән “Авангард“, чын мәгънәсендә, әгерҗелеләрнең авангарды булырга тиеш, – диде саубуллашканда Фәрит Мөхәммәтшин.


Рәмзия ЗАРИПОВА.