Исмәле, җил...

Узган якшәмбедән дүшәмбегә каршы төндә көчле җил күпләрнең йокысын качыргандыр, мөгаен. Ә менә Иж-Бәйки авылында давыл нәтиҗәсендә 40ка якын хуҗалык утсыз-газсыз да калды.

– 17 март көнне иртәнге сәгать дүрт тулганда Бердәм диспетчерлык хезмәтенә Иж-Бәйки авылының Үзәк урамында көчле җилнең зур агачны аударуы һәм шуның нәтиҗәсендә газ торбасына, электр линиясенә зыян килүе хакында хәбәр килеп иреште, – ди район янгын сүндерү бүлеге начальнигы урынбасары Ринас Яппаров. Шул сәбәпле, әлеге авылда 39 хуҗалык утсыз-газсыз кала.

– Район газ-эксплуатация һәм “Сетевая компания“ җәмгыятенең район электр челтәрләре хезмәткәрләре, иртәнге сәгатьләрдә үк гадәттән тыш хәл булган урынга килеп, торгызу эшләрен башлап җибәрделәр. Нәтиҗәдә, көндеге сәгать 12гә авыл халкы газлы да, утлы да булды, – ди авыл җирлеге башлыгы Айдар Хәлиуллин.

Газета укучыларыбыз хәбәр итүенчә, көчле җил аркасында тагын берничә авылда төнлә ут булмаган. Ә менә давылның тагын ниндидер объектларга зыян китерүе хакында башка хәбәр булмады, шөкер. Инде әбиләребез әйтмешли, алга таба хәвеф-хәтәрләрдән сакласын Ходай.