Әгерҗе районы башлыгы Валерий Макаровның “Семык“ республика мари мәдәнияте бәйрәмендә катнашучыларга котлавы

18 июньдә гүзәл табигатьле Әгерҗе районының Күләгәш җирлеге Татарстанның, Россиянең төрле төбәкләреннән күпсанлы мари дусларны үзенә җыя.

Әгерҗе – күпмилләтле район. Без шушы төбәктә тату, бердәм булып яшәүче татар, рус, мари, удмурт халыкларының дуслыгы белән горурланабыз. Марилар сан ягыннан Әгерҗе районында өченче урынны алып тора. Алар эшчән, алтын куллы, үз милләтләренең матур традицияләрен, йолаларын кадерләп саклаулары, бер-берсенә ярдәмчел булулары, районыбызның мәдәни, спорт тормышында актив катнашулары белән аерылып торалар.  Районыбыздагы “Эр уҗара“, “Курмызак олык“, “Кадрек сем“ мари фольклоры ансамбльләренең даны еракларга таралды. Аларның дәртле биюләре, күңелле җырлары районда гына түгел, марилар яшәгән башка төбәкләрдә дә бәйрәмнәрнең матур бизәге булып тора. Мари умартачылары җитештергән хуш исле балны Россиянең бик күп төбәкләрендә дә теләп сатып алалар. Мари чаңгычылары һәм йөгерешчеләре Әгерҗе районы данын еракларга тараттылар. 

Хөрмәтле кунаклар! Барыгызны да олы бәйрәм белән котлыйм. Быелгы “Семык“ төрле төбәкләрдән җыелган мариларны тагын да дуслаштырсын, берләштерсен, туганлаштырсын. Ата-бабаларыгыздан килгән матур традицияләрегезне киләчәк буыннарга тапшырып калдыруга тагын бер адым ясалсын. Бергә булыйк, дус яшик! Әгерҗе җирендә узган “Семык–2016“ күңелләрегездә матур хатирәләре белән озак саклансын! Пагалыме мари калык, Семык пайрем дене тендам саламлем!