Хезмәт ветераны исеменә кем лаек

“Гомер буе эшләдем, “Хезмәт ветераны“ исеме дә бирелмәде“ дип зарланучыларны еш ишетергә туры килә иде. Ниһаять, халык зарын ишеттеләр. 1 июльдән “Хезмәт ветераны турында“гы Федераль законның 7нче яңа маддәсе гамәлгә керде. 

Әлеге яңалык турында сөйләвен үтенеп, район халыкны социаль яклау бүлеге начальнигы Ольга ЕРЕМИНАга мөрәҗәгать иттек.  

– Хәзер 1 июльдән түбәндәге бүләкләре булган гражданнар Хезмәт ветераны булып саналалар:

• СССР һәм Россия Федерациясе орден-медальләре, мактаулы исемнәре булганнар;

• РФ Президенты Мактау грамоталары йә Рәхмәтләре белән бүләкләнгәннәр;

• ир-атларның кимендә 25 ел, хатын-кызларның  20 ел хезмәт стажы булган, бу тармакта кимендә 15 ел эшләп хезмәттәге казанышлары өчен ведомство билгесенә лаек булганнар;

• хезмәт эшчәнлеген сугыш  елларында балигъ булмаган яшьтә башлап, ир-атлар өчен хезмәт стажы кимендә  – 40, хатын-кызлар өчен 35 ел стажы булган гражданнар.

Хезмәт ветераны исемен алу өчен социаль яклау бүлегенә мөрәҗәгать итәргә кирәк.