Әлфия Когогина: наркотиклар куллануга тартылган өчен җаваплылык турындагы закон проекты яшь кешеләрнең гомерен саклап калырга ярдәм итәчәк
Дәүләт Думасы беренче укылышта наркотик чараларны, психотроп матдәләрне яки аларның аналогларын куллануга тарткан өчен җаваплылык турында җинаять һәм Җинаять-процессуаль кодексларына төзәтмәләр хуплады. Төзәтмәләр РФ Президенты Владимир Путин йөкләмәсе нигезендә парламентарийлар тарафыннан эшләнгән.
Дәүләт Думасы депутаты, Икътисадый сәясәт, сәнәгать, инновацион үсеш һәм эшкуарлык комитеты рәисе урынбасары Әлфия Когогина әлеге инициативаны шәрехләде:
"Безнең балаларны һәм яшьләрне наркотиклар куллануга тартучы җинаятьчел берләшмәләргә каршы көрәш нәтиҗәлерәк булырга тиеш. Без тәкъдим итә торган новелла наркотиклар куллануга тартылу өчен җаваплылыкны көчәйтә һәм җинаятьчел төркемнәрне оештыручылар һәм анда катнашучылар белән көрәштә ярдәм итәргә тиеш, димәк, кешеләрнең тормышын саклап калырга тиеш».
Аерым алганда, закон проекты белән җинаять Кодексын мәгълүмати-телекоммуникация челтәрләреннән («Интернет» челтәрен дә кертеп) файдаланып, әлеге җинаять кылган өчен җинаять җаваплылыгын күздә тоткан квалифицияле билге белән тулыландырырга тәкъдим ителә.
Наркотик, психотроп матдәләр яки аларның аналогларын куллануга тартылган өчен, саксызлык аркасында ике яки аннан да күбрәк зыян күрүченең үлеменә китергән очракта, җинаять җаваплылыгы арттырыла. Мондый гамәлләр 12-15 елга кадәр иректән мәхрүм итү белән, билгеле бер вазифаларны биләү яки 20 елга кадәр билгеле эшчәнлек белән шөгыльләнү хокукыннан мәхрүм ителәчәк.