Бүген Әгерҗедә район башлыгы кубогына чаңгы ярышлары узды
10 еллык тәнәфестән соң үткәрелгән бу ярышларда беренче урынны Бима мәктәбе командасы яулады, ул унтугыз медаль яулады.
Бүген Әгерҗенең " Орешник «паркында зур спорт бәйрәме – район башлыгы кубогына чаңгы ярышлары узды. Ике йөзгә якын мәктәп укучысы һәм спорт сөючеләр, хезмәт коллективларыннан чаңгыга чыктылар.
Спорт чарасында «Челтәр компаниясе» генераль директоры, Россия чаңгы узышлары федерациясе вице-президенты Илшат Фәрдиев, район башлыгы Азат Вәлиев, Кече Пурга районы башлыгы Сергей Юрин катнашты. Әйтергә кирәк, малопургалылар – безнең якын күршеләр, алар үзләренең иң көчле чаңгычылары белән дан тота.
- Республика ярышларында Әгерҗе районы чаңгычылары иң актив катнашучылар рәтендә. Сезнең тренерлар үсеп килүче буынны спортка җәлеп итү өчен зур көч куя, һәм егетләр үзләре дә югары спорт нәтиҗәләренә ирешү өчен тырышып эшлиләр, һәрвакыт ярышларда уңышлы чыгыш ясыйлар, – дип билгеләп үтте Илшат Фәрдиев.
Районда спортның бу төрен алга таба үстерү өчен ул «Буран» кар чанасы һәм 50 пар чаңгы комплекты бүләк итте. Тренерлар Евгений Яркеев, Геннадий Орехов, Эдуард Михайлов федерациянең Рәхмәт хатларына лаек булды.
Ярышларда катнашучыларның яшь диапазоны киң иде, 11 яшьлек мәктәп укучыларыннан башлап 70 яшькә кадәр спорт ветераннары.
- Трасса бик яхшы. Көн бик матур узды, нәкъ менә шундый һава торышы чаңгы ярышлары өчен кирәк тә, – дип сөенәләр спортчылар.
Җиңүчеләр мактау грамоталары, медальләр, акчалата призлар белән бүләкләнде.
Гомуми зачетта Бима мәктәбе алда бара, аның артыннан – 4 нче һәм 2 нче мәктәпләр. Алар кубоклар белән билгеләп үтелде.