Кичкетаңдагы гражданнар җыелышында сәламәтлек саклау буенча сораулар бирелде
Әгерҗе районының үзенчәлекле капкасы булган Кичкетаң авыл җирлеге торак пунктларның матурлыгына һәм төзеклегенә генә түгел, ә уңышлы фермерлар, нык шәхси хуҗалыклар булуга да үрнәк булып тора. Биредә, районның башка авыл җирлекләрендәге кебек үк, гражданнар җыелышы булды.
Халык җитәкчеләргә үзләрен борчыган сорауларны бирергә ашыкты.
- Гомер буе Кичкетаңда үз стоматологы булды. Узган елдан теш кабинеты ябылган. Минем инвалид балам бар. Аны Әгерҗегә стоматолог янына алып бару өчен һәр тапкыр машина ялларга мәҗбүр... - дип зарлана бер ханым.
Шулай ук Вәрҗе-Омгада фельдшер, җирлектә даруханә пункты булмавына кагылышлы сораулар да яңгырады. Кичкетаң амбулаториясендә ЭКГ аппараты сафтан чыкты.
Район башлыгы Азат Рөстәмович хәлне ачыкларга вәгъдә бирде.