Авыл халкына бушлай орлыклар өләшәчәкләр
20 миллион сумлык орлык сатылачак.
2016 елдан башлап Татарстанда авыл халкына язгы чорда бушлай орлыклар бирү рәвешендә ярдәм итү программасы эшләп килә. Быел Рәис Миңнеханов карары белән авыл халкына 20 миллион сумлык орлык таратылачак.
Аларны тарату белән район кулланучылар җәмгыяте шөгыльләнә. Район кулланучылар җәмгыяте идарәсе рәисе Рөстәм Ваһапов әйтүенчә, районыбызга барлыгы 700 кг суган, 20 кг кишер орлыгы, 25 кг чөгендер орлыгы кергән. Аларны авыл җирлекләре буенча халык санына карап бүлделәр.
Шулай ук район мәгариф идарәсе, мәктәп яны участокларында яшелчәләр утырту өчен, халыкны социаль яклау бүлеге орлык белән тәэмин ителгән.
- Яшелчә орлыкларын Голландиядән китерделәр, барлык яхшы сыйфатлар. Безнең төбәкнең климат шартларына туры килә, - дип аңлатты Рөстәм Раилевич.
Ул шулай ук көзен район кулланучылар җәмгыяте аша уңыш җыю оештырылачагын әйтте.
- Халыкның әзерләү конторасы аша артык яшелчә бирү мөмкинлеге бар. Шулай итеп, без алардан яшелчә сатып алып, ярминкәләрдә әгерҗелеләргә тәкъдим итәчәкбез, - диде ул.
Райпо идарәсе рәисе әйтүенчә, май аенда халыкка кәбестә үсентеләре дә таратылачак.
Без берничә авыл җирлеге администрациясенә шалтыраттык һәм орлыклар өләшүнең ничек баруы белән кызыксындык. Безгә хәбәр итүләренчә, Девәтернә, Исәнбай, Кучук, Кырынды һәм башка күп кенә авыл җирлекләрендә бу атнада шәхси ярдәмче хуҗалыкларга орлыклар тарату актив алып барылган.
Фото Исәнбай авыл җирлеге советы тарафыннан тәкъдим ителде.