Әгерҗе районы Советының йомгаклау утырышы булды
Район башлыгы үз докладында шулай ук икътисадта, КУЭ, төзелеш һәм ремонт, тимер юлда, авыл хуҗалыгында, сәламәтлек саклау, мәгариф һәм башка өлкәләрдә башкарылган эшләргә йомгак ясады.
2023 елда махсус операция зонасына Әгерҗе районыннан 44 млн сумлык 70 тонна гуманитар ярдәм җибәрелгән. Бу хакта район Советының йомгаклау утырышында район башлыгы Ленар Нургаянов хәбәр итте.
"Без һәрвакыт "Без бергә" дибез, бу сүзләр генә түгел. Без чыннан да бергә һәм алга таба хәрби хезмәткәрләргә, шулай ук аларның гаиләләренә һәрьяклап ярдәм күрсәтәчәкбез", - дип ышандырды җитәкче.
Район башлыгы үз докладында шулай ук икътисадта, КУЭ, төзелеш һәм ремонт, тимер юлда, авыл хуҗалыгында, сәламәтлек саклау, мәгариф һәм башка өлкәләрдә башкарылган эшләргә йомгак ясады.
Шулай итеп, “Унипарк” җәмгыяте (ТР Инвестиция венчур фондының бүлендек предприятиесе) белән икътисадый үсеш күрсәткечләрен яхшырту максатларында “Әгерҗе” сәнәгать паркын төзү, идарә итү һәм үстерү турында килешү төзелде. «Красный Бор» туристлык зонасын үстерү буенча эшләр алып барыла. Терсяларда техник киндер трестын беренчел эшкәртү цехын эшләтеп җибәрү планлаштырыла. Кичкетаң авыл җирлегендә катнаш азык җитештерү цехын ачу эше башланды.
Авыл хуҗалыгы өлкәсенә кагылгач, җитәкче терлекчелекне һәм үсемлекчелекне җентекләп яктыртты.
«Районның төп авыл хуҗалыгы предприятиеләре булган «Нәүрүз» җәмгыяте мегафермасында, бүген көнлек савым 16,7 кг тәшкил итә, гәрчә аны 25 килограммга кадәр җиткерү мөмкинлеге булса да. Комплексны тулысынча проект куәтенә җиткерү һәм нәтиҗәлелекне арттыру эшен дәвам итәргә кирәк», - диде спикер.
Моннан тыш, ул Сарсак-Омга җирлегендә мең башка исәпләнгән яңа терлекчелек комплексы төзергә планлаштыручы якташ эшкуар Илнур Сәетовка рәхмәт белдерде. Яңа Актүбә фермеры Фәнис Хаҗиев адресына да шундый ук рәхмәт сүзләре яңгырады.
«Ул шулай ук туган авылын төзекләндерүгә зур өлеш кертүе белән хөрмәткә лаек», - дип билгеләп үтте район башлыгы.
Үсемлекчелек юнәлешендә төп бурычларның берсе - техниканы кыр эшләренә вакытында әзерләү.
«Техниканы ремонтлауны 1 апрельгә төгәлләргә кирәк. Тагын бер төп бурыч - гектарга 80 кг исәбеннән ашлама кертү», - дип ассызыклады Ленар Нургаянов.
Төзелеш тармагы турында сөйләгәндә, ул коммуналь инфраструктураны модернизацияләү буенча федераль программа үтәлешенә аерым тукталды.
«Быел Әгерҗе районы әлеге программаны гамәлгә ашыруны дәвам итәчәк һәм республикада ике ел эчендә 100% җылылык челтәрләрен алыштырган беренче район булачак», - диде район җитәкчесе.
Ахырда ул "безне яңа эшләр көтә", дип ассызыклады.
"Бердәмлек булганда гына без куелган максатларга ирешәчәкбез. Ә безне барыбызны да туган җиребез, яраткан районыбыз берләштерә!» - диде ул.