Хәйрия концертында Әгерҗе халкы 30 мең сумнан артык акча җыйды

2024 елның 7 ноябре, пәнҗешәмбе

Әгерҗе шәһәрендә Халыклар бердәмлеге көнендә район мәдәният сараенда хәрби хезмәткәрләргә ярдәм йөзеннән хәйрия концерты узды. Бу кичне сәхнәдә Салагыш, Уразай, Ямурза, Кызыл Бор, Азев һәм Шаршададан иҗат коллективлары чыгыш ясады.

Концерт дәвамында залда бәйрәм, патриотизм һәм рухи бердәмлек атмосферасы хөкем сөрде. Тамашачылар төрле халыкларның биюләрен һәм җырларын яратып кабул иттеләр. Туган ягыбыз, ана һәм бала мәхәббәте турындагы җырлар, дуслык турындагы җырлар барчасына да тәэсир итте.

Барлыгы билетлар сатудан 31 340 сум җыя алган. Бу чаралар махсус хәрби операция катнашучыларына ярдәм итүгә юнәлдереләчәк.