Минтимер Шәймиев “Мәктәпкә җыенырга ярдәм ит” акциясенә старт бирде

Яңа уку елы һәр бала өчен бәйрәмгә әверелергә тиеш.  Белем көне малайлар-кызлар хәтерендә якты, матур булып истә калсын өчен, ел саен «Мәктәпкә җыенырга ярдәм ит” акциясе үткәрелә. Матди хәле нинди булуга да карамастан, бер бала да яшьтәшләре янында үзен ким итеп тоярга тиеш түгел бит.
11 августта Татарстан Дәүләт Киңәшчесе, “Яңарыш” республика фондының Попечительләр советы рәисе Минтимер Шәймиев Болгарда “Мәктәпкә җыенырга ярдәм ит” хәйрия акциясендә катнашты. Спас муниципаль районы  бу проектны беренче тапкыр гамәлгә ашыра.



- Балаларыбыз белем алырга тели, без алар турында кайгыртырга тиеш. Быел беренче тапкыр Спас районында шундый бәйрәм оештырыла. Хәзер илдә вәзгыять шактый катлаулы. Әмма Татарстанда глобаль кризис артык сизелми. 2013 елда Универсиада үткәрдек, Су спорты төрләре буенча Дөнья чемпионаты да узып китте, хәзер Татарстанда эшче һөнәрләр буенча Дөнья чемпионатын үткәрү хокукына ия булдык. Зур тырышлык бәрабәренә генә без икътисади яктан көчле булып калачакбыз, - диде Татарстан Дәүләт Киңәшчесе.

Быел акция тугызынчы тапкыр үткәрелә. Узган 8 елда акция ярдәмендә 176 мең 652 балага 163 миллион сумлык ярдәм күрсәтелгән. Былтыр гына да Татарстанда 36 мең 148 бала беренче тапкыр мәктәп бусагасын атлап кергән. Хәйрия акциясе кысаларында 17 меңнән артык укучыга мәктәп кирәк-яраклары белән булышканнар, шуларның 9 меңнән артыгы – аз керемле гаиләләрдә тәрбияләнүче малай-кызлар, ятимнәр, инвалид, караучысыз калган һәм ярдәмгә мохтаҗ  балалар. Моннан тыш, меңләгән 2-11 сыйныф укучысына да ярдәм күрсәтелгән.

Быелның 1 сентябрендә Спас районында 189 бала беренче сыйныфка бара. Аларның 130ына “Мәктәпкә җыенырга ярдәм ит” акциясе кысаларында булышлык күрсәтелә. 2-11 сыйныфта укучылар өстәмә матди ярдәм алачак. Бу максатларга районда 268 мең 960 сум акча җыелган.
Гомумән алганда, быел Татарстанда 39 мең 923 бала беренче мәртәбә мәктәп бусагасын атлап керә. Аларның 8522се ярдәмгә мохтаҗ. Шулай ук 2-11 сыйныфка баручыларны  да игътибарсыз калдырмаячаклар. Мәктәп букчасында, гадәттәгечә, канцелярия товарлары, дәфтәрләр, хезмәт һәм рәсем сәнгате өчен җыелмалар, мәктәп формасы комплекты, ә беренче сыйныф укучылары портфелендә “Болгар һәм Зөя буйлап балалар һәм ата-аналар өчен мавыктыргыч юл күрсәткеч” басмасы да урын алачак. Аны республикабыз тарихын популярлаштыру өчен Татарстан Тарихи һәм мәдәни һәйкәлләрне торгызу фонды, Мәдәният, Мәгариф һәм фән министрлыклары, Болгар дәүләт тарихи-архитектура музей-тыюлыгы, “Зөя утрау-шәһәрлеге” Дәүләт тарихи-архитектура һәм сәнгать музее һәм «Татармультфильм» студиясе әзерләгән.
 
Мохтаҗларга ярдләм итү һәм изге гамәлләр кылу – татарстанлылар тормышының аерылгысыз өлеше, ә “хәйрия” сүзе инде республикабыз дәүләт сәясәтенә әверелде. “Мәктәпкә җыенырга ярдәм ит” акциясе Татарстанда күркәм гадәткә әверелгән проектларны берсе. Ел саен республикада меңнән артык предприятие һәм оешма, 500дән артык коммерцияле структура һәм 300дән артык шәхси эшмәкәр әлеге проектны гамәлгә ашыруга үз өлешен кертә.