Көчек балалар бакчасына нибары 8 сабый йөри

Көчектә узган гражданнар җыенында район башлыгы Валерий Макаров балалар бакчасы һәм район мәгариф идарәсе хезмәткәрләре алдына “Сабыйлар бакчага йөрергә тиеш“ дигән бурыч куйды.

Балалар бакчасында бүгенге көндә нибары 8 бала тәрбияләнә. 10 сабыйны әти-әниләр бакчага йөртмиләр. Менә шуның сәбәпләрен ачыкларга, һәр әти-әни белән шәхси сөйләшергә әмер бирде район башлыгы. 

 Көчектә узган җыенда авыл башлыгы Рөстәм Нурмөхәммәтов авылны киләсе елга “Чиста су“ программасына кертүләрен сорап мөрәҗәгать итте. 

– 60нчы еллардагы су торбалары бик нык тузган һәм су теләсә каян бәреп чыгарга мөмкин, – диде ул. 

Шулай ук авылдагы 25 тополь агачын кисү бурычы да куелды. Авыл яшьләре “кичтән спорткомплексны ачсыннар иде“ дигән теләкләрен җиткерделәр.