Жил–давыллар куркыта

Авылларда көчле җил кайбер шәхси хуҗалыкларның түбәләреннән профнастилны алып ташлаган, иске коймалар ауган дигән хәбәрләр дә килеп иреште. Биектауда бер гасырлык тополь агачы газ торбасына төшкән. Иж-Бубыйда һәм Мордывыйда кыска ялганыш нәтиҗәсендә утны сүндереп торганнар. Электр чыбыклары өзелү очраклары булмаган.

– Көчле давыл турында без алдан ук барлык оешмаларга хәбәр итәбез. Бөтен хезмәтләр гадәттән тыш хәл очракларына әзер торалар. Райондашларга мөрәҗәгать итеп шуны әйтәм, көчле җил-давыл булганда карт агачлар,  иске йор-сарайлар янәшәсендә тормагыз. Сабыйларыгызны да урамда калдырмагыз, – дип кисәтә  янгын часте начальнигы  Ринас Яппаров.