Инвалидлар декадасы бездә шулай үтте..

2015 елның 10 декабре, пәнҗешәмбе

Җирле үзидарә рәисе Илфат Рамазанов ,мәдәният хезмәткәрләре  һәм авыл иганәчеләре Җәләев Илназ ,Самсонова Йолдыз ,Симаков Раил,3 нче филиал -Кадыбаш бүлекчәсе  ярдәме белән Кадыбаш үзидарә җирлегендәге яшәүче инвалидлар өчен аш-су мәҗлесе үткәрелде.Киләлмәгән инвалидлар – урын өстендә ятучыларга 10 кешегә өйләренә барып , хәлләрен белеп ,күчтәнәч өләштеләр.Илфат Галиевич   - инвалид дип, күңелегезне төшермәгез,  сез  барыгыз да зур хезмәт юлы үткәнсез ,олыгайган көнегездә балалар , оныклар тәрбиясе белән яшәргә язсын дип ,бәхетле картлык , хәерле гомер теләде .Картлыкка бирешмичә ,өметегезне өзмичә яшәгез әле дип сүзен төгәлләде .Мәдәният йортында мул табын әзерләп , татар халкының бәхәле ашы – бәлеш белән сыйладылар .Мәдәният хезмәткәрләре тарафыннан зур  концерт әзерләнгән иде . Кичәне алып баручы Фәридә Каюмова күңел төшенкелегенә бирелмичә , язмышка рәнҗемичә яшәгез әле дигән сүзләрне кат-кат кабатлады .Авылыбызның моңлы сандугачы Гөлнара Гафарованы кат-кат сорап җырлаттылар.Аның “Бер вакыт кына”  җырын тын да алмыйча тыңлап , узган гомергә нәтиҗә ясап утырдык.Авылыбыз мулласы Рәҗәп абый Нафиков -“Күңел төшенкелегенә бирелмичә яшәргә дә , яшәргә әле безгә , без һәрберебез тырышып хезмәт иттек ,яшьләргә дөрес юл күрсәтеп яшик”,- диде .Авылда бик күп чаралар үткәрелә ,эшләгәнебезне башка авыллар кебек күрсәтә белү кирәк диде. Мин үз чыгышымда “Күңел” дигән шигыремне укыдым .

Кеше күңеле һәрчак пыяла ,

Авыр сүзләр әйтсәң уала.

Тәмле телле , матур сүзләр генә ,

Йөрәгемә минем мең дәва .

Чыннан да инвалид кешенең төрле чагы була , күңел төшенкелегенә бирелгән чагы да еш була .Безнең җирлектә  58 инвалид яши икән , без бер-беребезгә көчтән килгән кадәр ярдәм итеп , хәлләребезне белешеп ,шулай аралашып яшик .Гомер көзебез муллыкта ,шатлыкта , бәхеттә  үтсен.Сүземне “Гомер көзем”  дигән шигырь белән тәмамладым:

Эзләрем көзләрдә җуелмас ,

Балкырмын берара,

Гомерләр бик кыска ,

Берәү дә килмәгән  мәңгегә ,

Дәвамым кала бит язларда ,

Шаулатып яшимен көзләрдә .

Кичәне оста биючеләребез Гүзәл һәм Ләйлә  , нәфис сүз белән Алсу Сибатова , җырчы кызыбыз Гөлназ Шарафиева дәвам иттеләр.

Мәҗлестә булган барлык инвалидлар , бик канәгать булып , бу аш-суны, күңел ачуны оештырган Кадыбаш авыл бирлеге советына , иганәчеләргә ,мәдәният хезмәткәрләренә зур рәхмәтләрен белдерделәр .Алдагы елларда да исән-сау булып ,очрашырга  язсын дип таралыштылар.

09.12.2015 ел. Фаягөл Әхмәтшина.

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International